ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន បានអញ្ជើញត្រឡប់ដល់រាជធានីភ្នំពេញវិញហើយ បន្ទាប់ពីសម្ដេចបានចាកចេញពីរដ្ឋធានីវ៉ាស៊ីនតោន សហរដ្ឋអាមេរិក នៅថ្ងៃទី១៤ ខែឧសភា ម្សិលមិញ។

យន្តហោះពិសេសនៃរដ្ឋាភិបាលកម្ពុជាបានជូនដំណើរសម្តេចតេជោនិងគណៈប្រតិភូអញ្ជើញមកដល់ព្រលានយន្តហោះអន្តរជាតិភ្នំពេញនៅវេលាម៉ោងប្រមាណ ៧និង៥០នាទីល្ងាច ថ្ងៃទី១៥ ខែឧសភានេះ។

តាមគម្រោងយន្តហោះពិសេសរបស់រាជរដ្ឋាភិបាលកម្ពុជាមកដល់ព្រលានអន្តរជាតិភ្នំពេញនៅវេលាម៉ោង៤ រសៀល តែដោយសារបញ្ហាអាកាសធាតុពីរដ្ឋអាឡាស្កា មកទីក្រុងសេអ៊ូល ប្រទេសកូរ៉េមានភាពមិនអំណោយផលទើបធ្វើឱ្យមានការយឺតយ៉ាវនៃការអញ្ជើញមកដល់។

គួរឱ្យដឹងផងដែរថា សម្ដេចតេជោ ហ៊ុន សែន និងគណៈប្រតិភូកម្ពុជាបានអញ្ជើញចាកចេញពីព្រះរាជាណាចក្រកម្ពុជាឆ្ពោះទៅរដ្ឋធានីវ៉ាស៊ីនតោនកាលពីថ្ងៃទី១១ ខែឧសភា ឆ្នាំ២០២២ ដើម្បីចូលរួមនឹងធ្វើជាសហប្រធាននៃកិច្ចប្រជុំកំពូលអាស៊ានអាមេរិ២០២២ ដែលជាជំនួបផ្ទាល់មុខលើកទី១ បន្ទាប់ពីឆ្នាំ២០១៧មក។

អាស៊ានក្រោមការដឹកនាំរបស់នាយករដ្ឋមន្ត្រីសម្ដេចតេជោ ហ៊ុន សែន ដែលបានចូលប្រជុំជាមួយនឹងប្រធានាធិបតីអាមេរិកនៅឆ្នាំ២០២២នេះ បានសម្រេចនូវលទ្ធផលជាទីមោទនៈដែលលទ្ធផលទាំងអស់នេះនឹងជំរុញនូវកិច្ចសហប្រតិបត្តិការនិងពង្រឹងនូវទំនាក់ទំនងរវាងអាស៊ាននិងអាមេរិកឲ្យកាន់តែកើនឡើងមួយកំរិតទៀតក៏ដូចជារក្សានូវស្ថិរភាពនៅក្នុងតំបន់ផងដែរ។ កាលពីយប់ថ្ងៃទី១៤ ខែឧសភា ក្រសួងការបរទេសកម្ពុជាបានឲ្យដឹងថាអាស៊ាននិងអាមេរិចបានសម្រេចនូវសេចក្ដីប្រកាសរួមដែលមានចំនួន ២៨ចំណុចជាមួយគ្នា៕